عامر شریف (سیالکوٹ) کی شاعری

aamir Sharif Ki Poetry-Best Urdu Poetry

غزل۔1

اے سرورِ مئے گلفام ذرا یاد کرو

اُس کہانی کا وہ انجام ذرا یاد کرو

پہلی بارش کی یہ بوندیں مجھے کچھ کہتی ہیں

سرد موسم کی وہی شام ذرا یاد کرو

یاد جتنی تھیں دعائیں مہِ تاباں، وہ سب

میں نے کر دی تھیں ترے نام ذرا یاد کرو

کہکشاں چاند ستارے نہ کہیں جوشِ جُنوں

اے مری کاوشِ ناکام ذرا یاد کرو

بزم امکاں تو وہیں چھوڑ ہی آئے عامر

اب اماوس کا یہ کہرام ذرا یاد کرو

عامرشریف

۔۔۔۔۔۔۔۔۔۔۔۔

غزل۔2

ڈرتا ہوں عشق حد سے گزر جائے بھی تو کیا

یہ ہار موتیوں کا بکھر جائے بھی تو کیا

پتھر ہوں آستانۂ حسن و جمالِ عشق

چھو کر مجھے تو اور نکھر جائے بھی تو کیا

پھر کوندنے لگی ہیں گھٹاؤں سے بجلیاں

پھر فتنۂ سکوت بپھر جائے بھی تو کیا

تارو ! وہ کھینچنا تو ذرا بے سبب خطوط

گویا کہ نقش دل میں اتر جائے بھی تو کیا

رم جھم برس رہی ہیں یہ بوندیں اِرم اِرم

عامر یہ سحر چار پہر جائے بھی تو کیا

عامرشریف

۔۔۔۔۔۔۔۔۔۔۔۔۔۔۔

غزل.3

گلوں میں نکہتِ گل رقص کرتے دیکھی ہے

یہ دل نشین اَدا چلتے چلتے دیکھی ہے

شجر پُکار اُٹھے مجھ کو دیکھ کر سارے

کسی کی گرد ہواؤں میں اُڑتے دیکھی ہے

گگن پہ لرزہ بر اندام سب ستاروں نے

شفق کے رنگ سے وحشت ٹپکتے دیکھی ہے

یہ بستئِ الَم و حزن کے مصاحب ہیں

اِنھوں نے وادیوں میں آگ جلتے دیکھی ہے

نزاکتوں کا تصرّف ہے یا نگاہِ کرم

فصیل برگ پہ شبنم مچلتے دیکھی ہے

گہن زدہ تھے شرارے، اُداس وہ منظر

اُفق سے آج مگر ضو نکلتے دیکھی ہے

عامرشریف

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تاریک گھپاؤں میں کہیں سہمے ڈرے لوگ

ظلمت کے خداؤں میں کہیں سہمے ڈرے لوگ

تقدیر کے آنگن میں ہے قدرت کا بسیرا

قدرت کی اداؤں میں کہیں سہمے ڈرے لوگ

امکان کے قدموں پہ مگر سینہ سپر ہیں

اپنی ہی دعاؤں میں کہیں سہمے ڈرے لوگ

اس عالمِ وحشت میں یہاں کس کو پکاریں

رنجور نواؤں میں کہیں سہمے ڈرے لوگ

ہر سمت مقابل ہے نئے درد کا کہرام

پُر خوف دشاؤں میں کہیں سہمے ڈرے لوگ

عامرشریف

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غزل.4
بھولے بسرے کئی زمانوں میں

آج اُلجھا ہوں پھر فسانوں میں

نا سمجھ! کیسی جستجو ٹھہری ؟

شوخ رنگین اِن دکانوں میں !!!!

چار سو دربدر کئی چہرے

اب کے میں بھی ہوں سرد خانوں میں

شور اٹّھے گا ان گھٹاؤں سے

ہاں، تلاطم ہے آسمانوں میں

لوگ ڈھونڈیں گے ایک دن عامر

مجھ کو مغموم داستانوں میں

عامرشریف

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ جو دنیا ہے آنی جانی ہے

زندگانی پس اک کہانی ہے

کبھی آنکھوں میں غم چھپاتا ہوں

کبھی پلکوں پہ گُل فشانی ہے

پھر ہوا کہہ رہی ہے پتّوں سے

پھر کوئی حکم آسمانی ہے

جس اَدا سے نگہ کا وار ہوا

اُس نگہ نے بھی کچھ تو ٹھانی ہے

داستاں خاک کی پسِ پردہ

دیمکوں سے سُنی زبانی ہے

یاالہی یہ کیا قیامت ہے

ہر کسی دل میں بدگمانی ہے

بول میٹھے دو بول دو عامر

چار دن کی یہ زندگانی ہے

عامرشریف

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نظم

خوں آغشتہ کشمیر

تاریک گھروندوں کی اک بات بتاتا ہوں

لکھ لکھ کے یہی نوحے سب درد جگاتا ہوں

جنت تھا چمن میرا، اب آگ کا دریا ہے

تم آؤ کہ جنّت کے منظر وہ دکھاتا ہوں

آخر تو ہم انساں تھے، حق رکھتے تھے جینے کا

کاٹی ہے گئی گردن، رو رو یہ بتاتا ہوں

ممتا نے جگر پیٹا، اک خوں کے سمندر میں

اُس خوں کے سمندر میں ہر روز نہاتا ہوں

روندا بھی گیا گھر گھر، بہنوں کا وہ پاک آنچل

مظلوم نگاھوں میں درد اپنے چھپاتا ہوں

ظلمت کے خداؤں کو معلوم نہیں لیکن

لاچار نہیں ہیں ہم، پیغام سناتا ہوں

عامرشریف